मंगलवार, जेष्ठ २०, २०७७
    राज्य-समाज

    केशव स्थापितलाई मन्त्रीपदबाट मुख्यमन्त्रीले गरे बर्खास्त, घटना र कारण यस्तो छ

    मुख्य मन्त्री पौडेल र स्थापितबीच बुधबार बसेको प्रदेशको मन्त्रिपरिषद् बैठकमा चर्काचकी भएको थियो

    शुक्रबार, १६ कार्तिक २०७५, आहाखबर

    काठमाडाैं, १६ कार्तिक 

    प्रदेश नम्बर तीनका मुख्यमन्त्री डोरमणि पौडेलले भौतिक पूर्वाधार तथा विकास मन्त्री केशव स्थापितलाई पदबाट बर्खास्त गरेका छन् । मुख्यमन्त्री पौडेलले स्थापितलाई संविधानको धारा १६९ को उपधार २ को खण्ड ख अनुसार बर्खास्त गरेका हुन् । 

    मुख्यमन्त्री पौडेलले स्थापित संविधानको धारा १६९ को उपाधार २ को खण्ड ख अनुसार स्थापितलाई बर्खास्त गरी उनको मन्त्रालयको जिम्मेवारी पनि आफैँले लिएका पौडेलका स्वकीय सचिव अनुप पौडेलले जानकारी दिए ।

    बुधबार प्रदेश मन्त्रीपरिषद बैठकमा मुख्यमन्त्री पौडेल र मन्त्री स्थापितबीच भनाभन भएपछि उनलाई बर्खास्त गर्ने तयारी भएको थियो ।

    मुख्यमन्त्रीसँग भनाभन भएपछि मन्त्री स्थापित हेटौंडाबाट लगत्तै काठमाण्डु आएका थिए । मुख्यमन्त्री पौडेल प्रधानमन्त्रीलाई भेटेर उनलाई बर्खास्त गर्ने योजनासहित बिहिबार नै काठमाण्डु आएका थिए ।

    नेपाल संघीय संरचनामा गएपछि पहिलो पटक बनेको प्रदेश सरकारबाट बर्खास्त भएका मन्त्री स्थापित पहिलाे मन्त्री हुन् ।

    मुख्यमन्त्रीमाथि अपशव्द प्रयोग भएको र मन्त्रीको जिम्मेवारी राम्रोसँग बहन नगरेको भन्दै पौडेल स्थापितसँग असन्तुष्ट थिए । 

    के हो घटना ? 

    मुख्यमन्त्रीमाथि अपशव्द प्रयोग भएको र मन्त्रीको जिम्मेवारी राम्रोसँग बहन नगरेको भन्दै पौडेल स्थापितसँग असन्तुष्ट थिए ।

    प्रदेश नम्बर ३ को बुधवारको मन्त्रिपरिषद् बैठक औपचारिक रूपमा सकिएपछि बैठकस्थलमा अनपेक्षित घटना भयो । प्रदेशका भौतिक पूर्वाधार विकास मन्त्री केशव स्थापित ‘म केही कुरा राख्छु,’ भन्दै बोल्न थाले ।

    मन्त्री स्थापितको प्रस्तुति उग्र थियो । उनी टेबुल ठटाउँदै चिच्याउन थाले । मुख्यमन्त्री डोरमणि पौडेललाई गालीगलौज समेत गरे । मुख्यमन्त्री चुपचाप बसेर सुनिरहेका थिए । दैनिक कामकाजका सामान्य विषयमा अाराेपित गर्दै उनी मुख्यमन्त्रीमाथि खनिएका थिए ।

    ‘केही कुरा छ भन्दै बोल्न थाल्नुभएका स्थापित मन्त्रीज्यू अभद्र शैलीमा प्रस्तुत हुनुभयो । मुख्यमन्त्रीज्यूलाई गालीगलौज समेत गर्नुभयो,’ अर्का एक मन्त्रीले  भने, ‘हामीले यो कुरा यहाँ नगरौं, यस विषयमा छुट्टै बसेर कुरा गर्दा उचित हुन्छ भन्यौं तर उहाँ टेबुल ठटाउँदै चिच्याउन छाड्नुभएन ।’

    त्यसो त बैठकअघि मुख्यमन्त्री पौडेल र मन्त्री स्थापितबीच करीब डेढ घण्टा एक्लाएक्लै बसेर छलफल भइसकेको थियो ।

    ‘मुख्यमन्त्रीज्यूसँग बैठकअघि उहाँले करीब डेढ घण्टा बसेर छलफल गर्नुभएको रहेछ,’ ती मन्त्रीले भने, ‘त्यसका बावजुद् पनि बैठकस्थलमा उहाँको प्रस्तुति निकै अभद्र थियो ।’

    मन्त्री स्थापितको कार्यशैलीबारे मुख्यमन्त्री पौडेल पहिलेदेखि नै असन्तुस्ट थिए । राम्रै बजेट भएको महत्त्वपूर्ण मन्त्रालय सम्हालेका मन्त्रीले अपेक्षित काम नगरेको उनको गुनासो थियो ।

    ‘प्रदेशको झण्डै आधा बजेट त त्यही मन्त्रालयमा छ,’ उनले भने, ‘तर उहाँ मन्त्रालयमा नबस्ने, घुमेर मात्र हिँड्ने । मुख्यमन्त्रीज्यूले तपाईं मन्त्रालयमा बस्नुपर्‍यो, काम गर्नुपर्‍यो भनेर पटक–पटक ध्यानाकर्षण गराउँदै आउनुभएको थियो ।

    त्यसअघि मन्त्रीपरिषद् बैठकमा सहकारी, दुग्ध विकास बोर्ड, एकीकृत बस्ती विकास लगायत ६ वटा एजेण्डामा छलफल भएको थियो । त्यसक्रममा स्थापितका सम्बन्धमा कुनै छलफल नै भएको थिएन ।

    पछिल्लो समय मन्त्री स्थापित अर्को एक विषयमा पनि विवादित छन् । काठमाडौं महानगरपालिकाकी पूर्व कर्मचारी रश्मिला प्रजापतिले स्थापितले आफूलाई यौन दुर्व्यवहार गरेको आरोप लगाएकी छन् । 

    आफूमाथि भएको दुर्व्यवहारविरुद्ध विश्वभरका महिलाहरूले प्रयोग गरेको ट्वीटर ह्यास ट्याग #MeToo मार्फत् प्रजापतिले काठमाडौं महानगरपालिकाका तत्कालीन मेयर स्थापितले आफूमाथि गरेको दुर्व्यवहारबारे अभिव्यक्ति सार्वजनिक गरेकी थिइन् ।

    बुधवार मन्त्री स्थापित आफैंले यस विषयमा पनि बोलेका थिए ।

    ‘मिटू ह्यास ट्याग बारेपनि उहाँले कुरा राख्नुभयो । ती महिलाले मलाई लगाएको आरोप गलत छ, अदालत जाने विचारमा छु, भन्नुभयो,’ ती मन्त्रीले भने ।

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast