शनिबार, जेष्ठ १७, २०७७
    आर्थिक खबर

    युवा कामको खोजीमा विदेश, स्वदेशका युवाले भने च्याउबाट मनग्य आम्दानी

    च्याउ खेतीको विस्तार गर्ने योजना,बजारमा सहजै बिक्री भइरहेकाले बजारको पनि समस्या नभएको

    आईतवार, १६ बैशाख २०७५, धनबहादुर भण्डारी .

    डडेल्धुरा, १५ वैशाख

    अधिकांश युवा कामको खोजीका लागि विदेश भौँतारिइरहेका बेला डडेल्धुराका केही युवाले भने च्याउ खेतीबाट राम्रो आम्दानी गर्न थालेका छन् । 

    च्याउ खेतीबाट यी युवा अहिले मासिक रु एकदेखि दुई लाखसम्म आम्दानी गर्न सफल भएका छन् । दैनिक ८० देखि १०० किलो च्याउ स्थानीय बजारदेखि जिल्ला सदरमुकाममा बिक्री गरिरहेको च्याउखेतीमा लागेका गन्यापधुरा–१ अशिग्राम, भात्काडाका खेमराज जोशीले बताए । 

    दैनिक करीब १०० किलोग्राम च्याउ बिक्री गर्दा १५ हजारभन्दा बढी आम्दानी हुने गरेको उद्यमी जोशीले जानकारी दिए । त्यसैगरी गन्यापधुरा गाउँपालिका–२ वडालमा च्याउखेती गरिरहेका हिरा भण्डारीले पनि दैनिक रु १० देखि १२ हजारसम्मको च्याउ बिक्री गरिरहेको बताए । 

    गन्यापधुरा गाउँपालिकाको भाँतकाडामा जमिन भाडामा लिई खेमराज जोशीले स्थानीय युवासँगको साझेदारीमा दुई वटा ठूला टनेल निर्माण गरी च्याउ खेती शुरु गरेका छन् भने गन्यापधुरा गाउँपालिका–२ वडालमा जमिन भाँडामा लिई हिरा भण्डारीले स्थानीयवासी युवासँगको साझेदारीमा च्याउ खेती शुरु गरेका छन् । 

    विदेश जानका लागि राहदानी बनाइ ठिक्क परेका यी चारैजना युवा आजभोलि च्याउ खेतीबाट विदेशको भन्दा पनि बढी आम्दानी गर्न थालेका छन् । च्याउ खेतीबाट राम्रो आम्दानी हुन थालेपछि च्याउ खेतीको विस्तार गर्ने योजनामा रहेको उनीहरुले बताए । 

    मेहनत गरिसकेपछि राम्रै आम्दानी भइरहेको बताउँदै अझै च्याउलाई विस्तार गरी अन्य परिकार निर्माण गर्नाका साथै अन्य जिल्लामा समेत पठाउने योजना बनाइरहेको भात्काडाका च्याउ उद्यमी जोशीले जानकारी दिए । 

    दुवै स्थानगरी चार टनेलमा एक हजार ६०० बलमा लगाइएको च्याउबाट दैनिक एक क्विन्टिल ५० किलोभन्दा बढी च्याउ बिक्री गर्ने गरेका छन् । अहिले कन्ने च्याउको उत्पादन गरिरहेको र विस्तारै गोब्रो च्याउको पनि उत्पादन गर्ने योजना रहेको उनीहरु बताउँछन् । 

    यहाँ उत्पादन हुने सम्पूर्ण च्याउ डडेल्धुरा सदरमुकामसहित अन्य बजारमा सहजै बिक्री भइरहेकाले बजारको पनि समस्या नभएको उनीहरुको भनाइ छ । 

    यी युवाको मेहनत देखेर आर्थिक तथा प्राविधिक सहयोग गर्ने गन्यापधुरा गाउँपालिकाका अध्यक्ष नवलबहादुर मल्लले बताए । यी युवाजस्तै अन्य नेपाली युवाले कृषि पेशालाई अङ्गाल्ने हो भने वैदेशिक रोजगारीका लागि भौँतारिनु नपर्ने अध्यक्ष मल्लको भनाइ छ ।

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast