मंगलवार, मंसिर ३, २०७६
    स्कुल-कलेज

    सर्भिस ट्रिप टु नेपाल

    नेपालमा स्वयम्सेवा गर्दै हङ्कङका विद्यार्थीहरु

    नेपालको शैक्षिक प्रणाली तथा नेपाल र हङ्कङबीचको समानता र भिन्नताबारे जानकारी लिने उद्देश्यले नेपालको भ्रमण

    बुधबार, १९ पौष २०७४, आहाखबर
    युनिभर्सिटी अफ हङ्कङ

    धुलिखेल, १९ पुस । 

    युनिभर्सिटी अफ हङ्कङका विद्यार्थीले काभ्रेपलाञ्चोकको नमोबुद्ध नगरपालिका–८ स्थित दाप्चा माध्यमिक विद्यालयमा स्वयंमसेवा गरिरहेका छन् । 

    ‘सर्भिस ट्रिप टु नेपाल’ नाम दिएर पुस १४ गते विद्यालयमा पुगेका २३ जना विद्यार्थीले पुस २० गतेसम्म बसेर स्वमंसेवा गर्ने भएको विद्यालयले जनाएको छ । 

    “हङ्कङका विद्यार्थी आएर हालसम्म सरसफाइ, डेक्स बेञ्च रंगरोगन र पढाउने कामसमेत गरिरहेका छन्,” विद्यालयका प्रधानाध्यापक दिनेशप्रसाद अधिकारीले भने  । नेपालको शैक्षिक प्रणाली तथा नेपाल र हङ्कङबीचको समानता र भिन्नताबारे जानकारी लिने उद्देश्यले नेपाल आएको हङ्कङका विद्यार्थीले बताएका छन् । 

    सात दिनसम्म समुदायमा नै बिताउने उनीहरुले विद्यालयका विद्यार्थीलाई न्यानो कपडा र शैक्षिक सामग्री बितरण गर्नुका साथै भाषासम्बन्धी कक्षासमेत लिइरहेका छन्   । विशेष गरी संस्कृति आदनप्रदानका लागि आएका उनीहरु विद्यार्थीको घरमा बसेर यहाँको संस्कृति, परम्परा, रीतिरिवाज र भाषाका बारेमा पनि जानकारी लिने-दिने तथा दाप्चा आसपासमा रहेका मठ मन्दिरमा गएर सरसफाइको कामसमेत गरिरहेको विद्यालयका प्रधानाध्यापक अधिकारीले बताए  । त्यससँगै स्थानीय भूकम्पपीडितको घर निर्माणका क्रममा ढुंगा र इँटा ओसार्ने काममा समेत सहयोग गरिरहेको उनले बताए । 

    सो क्रममा उक्त समूहले यहि विहिबार २० गते विद्यालयका लागि दुई थान कम्प्युटरसमेत हस्तान्तरण गर्ने कार्यक्रम रहेको अधिकारीले बताएका छन्  । विद्यालय आउने हङ्कङका विद्यार्थी र इन्स्पायर नेपाललगायतको सहयोगी भावनाबाट आफू निकै प्रभावित भएको विद्यालय व्यवस्थापन समितिका अध्यक्ष बिलबहादुर श्रेष्ठले बताए  । 

    इन्स्पायर एक्सचेञ्ज नेपाल नामक संस्थामार्फत नेपालमा आएका विद्यार्थीले विगत पाँच वर्षदेखि यस्तै स्वयंसेवी काम गर्दै आएको संस्थाका संयोजक अनिल सैंजुले बताए  । 

    “संस्कृति र शिक्षाका बारेमा ज्ञान आदनप्रदान गर्ने उद्देश्यले नेपाल आउने गरेका हङ्कङका विद्यार्थी समूहले काभ्रेपलाञ्चोक जिल्लाका विभिन्न स्थानमा रहेका विद्यालयका विद्यार्थीबीच सहयोगको आदनप्रदान गर्नाका साथै सकेका सहयोग गर्दै आइरहेबम छन्,” सैंजुले भने , “अहिलेसम्ममा जिल्लाको पनौती, कुशादेवी, ढुंखर्क र बल्थलीलगायतका ठाउँमा भोलेन्टियर गरिसकेको छ ।” 

    हरेक वर्ष इन्स्पायर एक्सचेञ्ज नेपाल नामक संस्थामार्फत आउने गरेका विद्यार्थी फरक फरक समूहमा आउने गरेको पनि उनले बताए  । उक्त विद्यार्थीको समूह शनिबार नै हङ्कङ फर्किने जनाएको छ । 
     

    तपाईको समाचार, लेख /रचना वा सुझाव भएमा news@aahakhabar.com मा पठाउनुहोला ।

    यसमा तपाईको प्रतिक्रिया (Comment)
    Weather Forecast